Happy Valentines Day to all my readers! You guys stick with me year after year and I really appreciate it. I found a little poem that always makes me smile. I hope you enjoy the following as much as I did:
by Louise Bennett
Me darling love, me lickle dove,
Me dumplin, me gizada,
Me sweetie Sue, I goes fa you
Like how flies goes fa sugar.
As a puts me pen to paper and me pen- nib start fi fly,
Me rememberance remember
De fus day yuh ketch me yeye!
You did jus come off a tramcar,
A bus was to yuh right,
A car swips pass yuh lef aise,
An yuh tanup stiff wid fright.
Yu jaw drap, yuh mout open,
Jus like when jackass start yawn;
Me heart go boogoo-boogoo,
An me know wha mek me bawn!
Do, no scorn me lickle letter; no laugh after me, yaw-
Me learnin not too gran, so what me cyan spell me wi draw!
De ting eena de corner wid de freckles, is me heart;
An de plate wid yam an saltfish mean dat we can never part.
See how me draw de two face dem
Dah look pon one anoder?
Well, one is me an one is yuh – tek any one yuh rader.
Is not a cockroach foot dis, is a finger wid a ring!
An it mean me want fi married yuh,
Dis line is a piece of string-
Tek it put roun de weddin finger a yuh weddin han.
Careful fi get de right size,
An den gi it to dis man.
De man is me. Now, sweet rice,
Keep swell till ah see yuh nex.
Accept me young heart while ah close
Wid love and bans a x!